عاجزة الخطاوي // بقلم الشاعرة ا. قوت من الجنة

قصيده بالعامية
.......................
عاجزه الخطاوى
........................
عاجزه الخطاوى ومسنودين
على كتف عكازه الخشب
كان كل امله ف الحياه
يمشى وياخد بالسبب
حافظ طريقه وقبلته
بالصوت ..ويمكن بالصدى
يا هل ترى ؟
ضل الطريق واللا اهتدى ؟
كان الولد فى المبتدأ ..
فاتح ف حضنه ضلفتين
بيضم كل الطيبين.
كان بدنه أقوى م الحديد
لكن تملى مستكين !
يرفع شماله يجيب شموس
والضل ف دراعه اليمين
الحق دايما سكته
ماوقفش يوم بين البنين
كان الولد مضرب مثل
تفسير لحلم المهزومين
دلوقتى شفته ف الطريق
محنى كما تمثال قديم
مسنود على عكاز خشب
قربت منه خطوتين
كلمته بس .. مابصليش
كانت عيونه ف اتجاه
غير اتجاهى ووقفتى
حسيت ساعتها بارتباك
وشويه زادت ربكتى
لما انتبهت ان البياض
غطى عيونه الطيبين
راح البصر ............
لكنه كان بالمختصر
عنده البصيره ......
من حديد .
بقلم/ قوت من الجنة