من ديوانى فى العاميه
قصيدة بعنوان((وبتحايل))
بقلمى ....محمد مغاورى
___________________
وبتحايل على بكره
يدنّو بعيد على ماالقى فى يوم...نفسى
على ماابقى فى أرض الله مانيش خايف....ولا منسى
ولا ماشى بعرض طريق
ولا صدّيق لإكذوبة غرام ..يأسى
ما انا الفاطر بألف رغيف من الأوهام
ولا بشبع
ولا بسمع كمان ...همسى
أنا المحبوس على ذمة قضايا وعود
ليوم مشهود يكون اجمل من امبارح
ويحضر لى فى يوم...عرسى
على الايام يصالحنى..يفاتحنى فى كام موضوع
وينصحنى اكون مسموع
ومش ندمان على ..غرسى
فى أرض الغير يلاقينى
وليا مصير يعدّينى
يودّينى تملّى هناك
لدنيا حروفها من درسى
.....................................
أنا المكسى
متين لفه بتمنعنى من الطيران
لبر أمان ..ولى زمان
وبتحايل
على بكره يدنّو بعيد...بلبس العيد ليتعكر
ويلعن نومك الأغبر
على أكبر مكان فى الذات
ياحلم شتات .........مخلينى
مابين من فات وودعنا وجانا فى لحظه
رجعنا لأول نقطه ..نبكيها
ونحكيها بصوت...... مكتوم
مايسمعنا..دبيب النمل فى قلوبنا يغلّبنا .......
ويغلبنا شعور موجوع
وكنز دموع فى ترحاله
وأحواله سكوت فى سكوت
وبين منحوت وزاده الموت
يادوب باكل على ضرسى
يادوب واصل... ومن نفسى
