انا التايه // بقلم الشاعر ا / سيد صادق

انا التايه ف وسط الناس ..
انا المكتوب ومش باين ..
انا المحمي ب الحراس..
وتاني يوم بكون خاين ..
انا اللى باعوني للنخاس ..
من غير حتى ما اتعاين
انا صوت لكن منبوح ..
انا ضحكه و مسروقة ..
انا الاد وانا المسموح ..
انا فكره ومحروقه ..
انا شهقه طالعه بروح ..
طالعه و هي محقوقه .
انا الماشي ومش شايف
انا العريان و متغطي ..
انا الخايف ومش خايف
و لجل اللقمة انا بوطى
انا الجاهل وانا عارف ..
بحر امالي ساب شطي

انا الزرعه ف أرض الموت
انا الصوت اللي مش واصل
انا اللي بجري لجل القوت
و بجري جرى متواصل
انا اللي مهما عمره يفوت
ما عمره يوم طلع فاصل
انا العايش لكن بشروط
اكون مطروح من الحاصل
انا اللي تمنى كام سحتوت
و سيدي ف سعري بيفاصل
انا الصابر و مش راضي ..
انا العايش على الفاضي ..
انا اللي مهما عمره يفوت ..
ويجي الموت بقول عادي
انا المالك وانا المطرود ..
انا الميت وانا مولود ..
انا اللي مهما اقول واعيد
حلمي بعيد واقول عادي
انا شيخ ملوش اتباع ..
انا الشاري وانا باتباع ..
انا اللي مهما حقه يضيع ..
عمري ما ابيع وده العادي
انا طير و مش طاير ..
انا اللي تملي بتعاير ...
انا اللي مهما اكون مهموم
بعدي اليوم واقول عادي
سيد صادق