رسالة الى الشعراء // بقلم الشاعر ا. طارق السيد

رسالة الي الشعراء
ياشعرا بألف لسان
ألفوا كلكوا في ديوان
إركبوا على سرج خيالكو
وإسرحوا في التبيان
وإحكولنا على إللي قابلكوا
وإنتوا بترمحوا بحصانكو
وإحنا نطرطأ في ودانّا
و في نن عنينا نشيلكو
و تقولوا حاجة تنفعنا
تشجينا وتمتعنا
دي الكلمة غذاء الروح
قولوا كلمة تسد في جوعنا
ماهو فيه كلمة تجمعنا
شايلة على جناحها المعنى
طيران توصل لعقولنا
تمخمخنا وتشبعنا
وفيه كلمة تصدعنا
أو كلمة بتلوي دراعنا
إياكم يوم تتنازلوا
وتكونوا سبب أوجاعنا
زي ماغيركو إتنازل
وكتب تفاهات ومهازل
أصبح زي المنشار
واكل طالع نازل
يعلن قد حان الآن
فيلم سكوب ألوان
بحروفه يصور مشهد
أبطاله فلانة وفلان
فلانة بعينها الزرقا
جرحت في المدعو فلان
وينهي الفيلم بفرقة
فهمتوا ياشعرا كلامنا
هل هتحققوا أحلامنا ؟
ولا هتتنازلوا في يوم
وتضيعوا فيكو أملنا
بقلم طارق السيد